"Пагадненне памiж Урадам Рэспублiкi Беларусь i Урадам Рэспублiкi Польшча аб асноўных прынцыпах трансгранiчнага супрацоўнiцтва"
Архив ноябрь 2011 года
<< Назад |
<<< Навигация Содержание
--------------------------------
<*> Вступило в силу 20 октября 1992 года.
Урад Рэспублiкi Беларусь i Урад Рэспублiкi Польшча, званыя далей "Бакамi",
кiруючыся прынцыпамi, выказанымi ў Дэкларацыi аб добрасуседстве, узаемаразуменнi i супрацоўнiцтве памiж Рэспублiкай Беларусь i Рэспублiкай Польшча ад 10 кастрычнiка 1991 года,
маючы на ўвазе Рамавую Еўрапейскую канвенцыю аб трансгранiчным супрацоўнiцтве памiж супольнымi i тэрытарыяльнымi ўладамi ад 21 мая 1980 года,
улiчваючы тое, што трансгранiчнае супрацоўнiцтва будзе спрыяць замацаванню цесных сувязей памiж Рэспублiкай Беларусь i Рэспублiкай Польшча,
усведамляючы значэнне, якое будзе мець супрацоўнiцтва памiж рэгiянальнымi i мясцовымi ўладамi абедзвюх дзяржаў,
рашуча падтрымлiваючы гэта супрацоўнiцтва i такiм чынам садзейнiчаючы эканамiчнаму i сацыяльнаму прагрэсу рэгiёнаў абедзвюх дзяржаў, у тым лiку iх прыгранiчных раёнаў,
дамовiлiся аб наступным:
Артыкул 1
1. Згаданыя ў гэтым Пагадненнi тэрмiны маюць наступнае значэнне:
- "трансгранiчнае супрацоўнiцтва" азначае ўсе ўзгодненыя меры ў эканамiчнай, юрыдычнай, тэхнiчнай, навуковай, культурнай i iншых сферах, накiраваныя на ўмацаванне i развiццё ўзаемаадносiн памiж рэгiянальнымi i мясцовымi ўладамi абедзвюх дзяржаў, а таксама заключэнне адпаведных пагадненняў;
- "рэгiянальныя ўлады" азначае тэрытарыяльныя ўлады, а таксама iх органы, якiя згодна з нацыянальным заканадаўствам кожнай дзяржавы вырашаюць рэгiянальныя задачы;
- "мясцовыя ўлады" азначае тэрытарыяльныя ўлады, а таксама iх органы, якiя згодна з нацыянальным заканадаўствам кожнай дзяржавы вырашаюць мясцовыя задачы.
2. Бакi дадуць адзiн аднаму iнфармацыю, патрэбную для ўдакладнення значэння тэрмiнаў "рэгiянальныя ўлады" i "мясцовыя ўлады".
Артыкул 2
1. Цэнтральныя органы выканаўчай улады абедзвюх дзяржаў будуць iнфармаваць рэгiянальныя i мясцовыя ўлады аб магчымасцях дзеяння гэтых улад у галiне трансгранiчнага супрацоўнiцтва.
2. Бакi шляхам узаемных дамоўленасцей будуць спрыяць стварэнню рэгiянальным i мясцовым уладам адпаведных умоў для ажыццяўлення трансгранiчнага супрацоўнiцтва.
3. Гэта Пагадненне не парушае ўжо iснуючых норм трансгранiчнага супрацоўнiцтва абедзвюх дзяржаў, асаблiва тых, якiя вынiкаюць з мiжнародных дагавораў.
4. Гэта Пагадненне не парушае правамоцтваў рэгiянальных i мясцовых улад, якiя вызначаны нацыянальным заканадаўствам кожнай з дзяржаў.
5. Кожная з дзяржаў можа ў любы час вызначыць частку сваёй тэрыторыi, прадмет i форму супрацоўнiцтва, да якiх гэта Пагадненне не будзе мець дачынення.
Артыкул 3
Па сумеснай дамоўленасцi Бакi могуць зрабiць адпаведныя захады з мэтай змены тых палажэнняў нацыянальнага заканадаўства, якiя ўскладняюць трансгранiчнае супрацоўнiцтва.
Артыкул 4
Бакi прыкладуць усе магчымыя намаганнi з мэтай вырашэння спрэчных пытанняў, якiя ўскладняюць трансгранiчнае супрацоўнiцтва.
Артыкул 5
Прадметам трансгранiчнага супрацоўнiцтва будзе, у прыватнасцi:
- развiццё рэгiёнаў, гарадоў i сельскiх раёнаў;
- тэрытарыяльныя планаванне i гаспадарка,
- транспарт i камунiкацыi /сродкi грамадскага транспарту, дарогi, аэрапорты, водныя шляхi, марскiя порты i порты на ўнутраных водных шляхах/,
- забеспячэнне электраэнергiяй, прыродным газам i вадой,
- ахова прыроды /нацыянальныя паркi, запаведнiкi, месцы адпачынку/,
- ахова навакольнага асяроддзя /барацьба з забруджваннем вады, паветра i глебы, будаўнiцтва ачышчальных збудаванняў, каналiзацыйных сетак i ўстановак для ўтылiзацыi адходаў/,
- прамысловае супрацоўнiцтва /кааператыўныя сувязi, стварэнне сумесных прадпрыемстваў/,
- гандлёвы абмен,
- сельская гаспадарка /развiццё агратэхнiкi, перапрацоўка i збыт сельскагаспадарчай прадукцыi/,
- адукацыя i навуковыя даследаваннi /прафесiянальнае навучанне, дапамога па вывучэнню мовы другой дзяржавы/,
- ахова здароўя,
- культура i мастацтва,
- турызм, адпачынак i спорт,
- барацьба са злачыннасцю,
- узаемная дапамога ў выпадку катастроф i стыхiйных бедстваў /эпiдэмii, паводкi, пажары, горнапрамысловыя катастрофы, транспартныя здарэннi/.
Артыкул 6
Рэгiянальныя або мясцовыя ўлады могуць заключаць грамадзянска-прававыя i iншыя дагаворы ў галiне трансгранiчнага супрацоўнiцтва, аб якiм гаворыцца ў пункце 1 Артыкула 1 i ў Артыкуле 5 гэтага Пагаднення. Гэта датычыцца, у прыватнасцi, дагавораў аб пастаўках, аказаннi паслуг i стварэннi сумесных прадпрыемстваў.
Рэалiзацыю гэтых дагавораў вышэйназваныя ўлады могуць дэлегаваць фiзiчным асобам, установам, прадпрыемствам i iншым юрыдычным асобам згодна з заканадаўствам, якое дзейнiчае на тэрыторыi адпаведнай дзяржавы.
Артыкул 7
1. З мэтай ажыццяўлення трансгранiчнага супрацоўнiцтва Бакi створаць Беларуска-польскую мiжурадавую каардынацыйную камiсiю па справах трансгранiчнага супрацоўнiцтва, званую далей "Камiсiяй".
2. На рэгiянальным i мясцовым узроўнях адпаведнымi ўладамi могуць быць створаны сумесныя каардынацыйныя органы па справах трансгранiчнага супрацоўнiцтва.
Артыкул 8
1. Задачай Камiсii з'яўляецца каардынацыя агульных напрамкаў, праграм i форм трансгранiчнага супрацоўнiцтва i разглад спрэчных пытанняў, якiя ўскладняюць гэта супрацоўнiцтва.
Камiсiя распрацоўвае таксама рэкамендацыi па стварэнню сумесных рэгiянальных i мясцовых каардынацыйных органаў па справах трансгранiчнага супрацоўнiцтва.
2. Камiсiя сустракаецца згодна з неабходнасцю, аднак не радзей двух разоў ў год.
3. Камiсiя можа запрашаць экспертаў для даследавання асобных праблем.
Артыкул 9
Выдаткi па ўдзелу ў пасяджэннях сумесных каардынацыйных органаў пакрываюцца са сродкаў рэгiянальных цi мясцовых улад, якiя дэлегуюць на гэтыя пасяджэннi сваiх прадстаўнiкоў.
Артыкул 10
Бакi рэкамендуюць сумесным каардынацыйным органам карыстацца ўзорамi пагадненняў, грамадзянска-прававых дагавораў i статутаў, якiя з'яўляюцца дадаткамi да Рамавай Еўрапейскай канвенцыi аб трансгранiчным супрацоўнiцтве памiж супольнiцтвамi i тэрытарыяльнымi ўладамi ад 21 мая 1980 г.
Артыкул 11
1. Гэта Пагадненне падлягае прыняццю згодна з заканадаўствам кожнай з дзяржаў i будзе ўведзена ў дзеянне ў дзень абмену нотамi з паведамленнем аб гэтым прыняццi.
2. Гэта Пагадненне заключаецца тэрмiнам на 10 гадоў. Яго дзеянне будзе затым аўтаматычна працягвацца на пяцiгадовыя перыяды, калi нi адзiн з Бакоў не паведамiць другому Боку аб сваiм жаданнi дэнансаваць яго не пазней чым за 6 месяцаў да сканчэння адпаведнага тэрмiну.
Здзейснена ў Варшаве 24 красавiка 1992 года ў двух экземплярах, кожны з якiх на беларускай i польскай мовах, прычым абодва тэксты маюць аднолькавую сiлу.
Па ўпаўнаважанню Урада Рэспублiкi Па ўпаўнаважанню Урада Рэспублiкi
Беларусь Польша
Подпiс Подпiс
Право Украины 2009 (Приказы) карта новых документов | 
